|
＠連日大雨過後，正係溯澗既好時機，計劃前往田尾坑。早在一年前睇完野外動向既介紹已經好想一遊，估唔到搞左成年先去到…
  
＠昨晚商討行程，癲佬同花花嫌遠所以鴿子一隻入手。但係都四人小組成團，太好。西貢食個靚早餐，本想撘村巴入西灣路，點知死仔競食得慢條斯理，搞到走車要打的…
＠去到田尾坑之前既一個澗位，被水源充沛既澗容吸引左落車，本想加料先探一探呢條名不經傳既石澗，但發現下方係地龍出口，洪水從洞口湧出捲上半空不能橫越入澗，十分誇張。所以放棄計劃，步行多１５分鐘去到田尾坑既入口。
 
＠在橋左進入田尾坑，先下扳一遊傳說中既精華段，極度大水，成條澗都係激流。
  
＠下降沒多久就去到第一個景點「放翠瀑」。瀑高六七米，在壁右傾注入下方的碗潭。
 
＠十分出色既「放翠瀑」，真係一個開爐大休既好地方，可惜今日無預備，可惜。放翠潭斷估深過兩米，嬉水𣈱泳一流！第一時間游至瀑底進行攀瀑行動。
 
＠極大水，手位腳位全被覆蓋！腳一企唔實都被水沖郁！到達左傳說中叫做「被困」既境地。典左一段時間終於落返少少，再使出誠意撻水技脫困。點知瀑下的潭水極淺…
  
＠太正！在放翠潭休息了好一陣子，又係浸到失溫先肯走，沿一段平緩澗道離開。
  
＠數十米外有一左折的小水道，可以落去享受下水力按摩。
  
＠旁邊的岩石形態及色彩有別於前段，呈淺啡色及白色，上面還有很多斜紋。就起呢個時候竟然落起雨來，雨勢頗大，小隊便躲在澗道旁樹下避一避雨，辛好只是過雲雨。
  
＠再來便到達石棧廊，一條筆直水道下駁一長形潭，澗水而降或在水道旁岩石左攀右扳亦可。石棧廊潭的水頗為混濁，可能被剛剛既雨水沖起左潭底既沉積物…
  
＠過石棧廊潭後朝遠方一看，為眼前景象嚇了一下，做乜事突然咁開揚！！走前一望發現澗勢突降數十尺，前方危壁聳立！飛流傾瀉而下！原來到左丹壁雙瀑頂，太癲！！
 
＠丹壁雙瀑分上下兩層，中間有一極淺小潭，激流注入再經下瀑流入丹壁潭。之前睇書淨係知道丹壁潭之名同雙瀑既存在，但係無相睇，估唔到係咁癲！！
 
＠丹壁潭之名由自其上方一呈暗紅色的斷崖，崖頂仲有一凸出的巨岩看似搖搖欲墜！配合對峙的丹壁雙瀑，其勢之雄奇其勝許多知名大澗的景觀！！選在今日豐水既日子一遊真係做得太岩！！
  
＠前方危壁突立，真係嚇一嚇，先行一探睇下點下攀先最安全。觀察過後發現左右二路都有人行，但右(落澗方向)較險，加上今日大水，右路有許些腳位都變了濕壁。而左路就避開了瀑布，手腳位充足，較為可行。先行一探，除了有一個位置背後懸空頗嚇人之外，其他位置都ＯＫ，於是就小隊就由此路下降。
  
  
＠安全成功下降，人肉Belay上落兩次，攀多兩次熟手了覺得幾好玩。落到去第一時間做野，同競競意圖鼠入上瀑激流之中，好癲！！太狂野既瀑布，完全唔可以正面承受飛流既衝擊！稍為進入少許已經好似被人用流星拳怒𡁻背門！！
 
＠行動失敗，撤走。典返上瀑對著的一個石台上小休一會便再起行。沿石台下攀至下瀑及丹壁潭一賞雙瀑連放。
  
＠下溯既旅程亦到進入尾聲，再經過一短打闊瀑，下方亦接一口寬潭，但係已經玩到失溫，都係快手快腳出澗尾大休食野。
 
＠轉多一個靚彎就見到萬宜水庫啦，遠方仲見到西壩添！極好天！！就地乾糧大休。
＠水塘入面好多小魚，諗住行出去望多兩眼，點知唔小心跣腳跌左落水塘…＝＿\＝
  
＠大休完畢都係１２點半，大把時間玩埋上源，沿路逃脫返西灣路先。再睇多一次沿路既所有景點，十分出色。石棧廊潭既水經過個多小時既沉澱又清返好多可以一游啦！！
  
＠今朝玩左兩個鐘既下游，在不作停留之下大半個小時便完成返到橋底，真係好短。點知剛開始上游旅程又搞事！阿鬼突然順水推舟左一Hit爆了腳甲。幸好只係小傷。
  
＠繼續漫長的平緩澗道…好難想像同下游係同一條澗，剛剛既大澗風範完全咁消失左。
＠上游最大瀑布，大休既好地方，瀑下有一淺潭，但係平時黎好有可能係死水。過此瀑便到達堤壩，壩後再次進入平緩的林蔭澗道，澗道上無石可躍，全程要澗水而行。
  
＠就咁一路要去到尾段位置先至再有一個開揚的位置，在這裡有一個三疊小瀑，小休。
  
＠受傷！？！？ ＠奇異彩色果子。 ＠小休完繼續上路。
  
＠再有一長蛇狀的流瀑，頗高，可以沿瀑上攀或在瀑左繞岩石而上。上攀此瀑幾好Feel，好有重出生天既感覺。過此瀑就到達旅程既尾聲。
  
＠相信可以繼續沿澗上溯至山坳，但係我地見到澗左有退路，都係快閃！點知都係離唔開林藝既厄運，條出澗路都還好，接出的攔腰山路竟然密左！頂！！
＠出走大田之間的山坳，由於時間關係已經玩唔到鰂魚湖，唯有下次先。閒盪上４０８睇風景，極天清氣朗！真係久違了既藍天白雲！第一次上４０８感覺唔錯！！
  
＠山頂怒影相，之後急步沿古道下降鰂魚湖又中了一計，又係密左，仲要極跣腳！！沿途吸收左無數蛛網，同木林蜘蛛融為一體…最後在馬路邊護土牆頂鼠返出黎，有一ｄ路真係一世人只會行一次。
＠但係總括黎講今日既行程都係極之出色，大水既田尾下游、水塘景同埋４０８上風光好，贏左。
2005年6月25日 |
