溯澗尋幽

  新界北區 NTN
  新界中區 NTC
  新界西區 NTW
  西貢及清水灣 SK & CWB
  大嶼山 Lantau
  九龍區 Kowloon
  香港島 HK
   
  返回溯澗尋幽目錄
  返回遊記目錄

 

Pui
澗

地圖鳳飛倒仰

久違的突發活動。休息了大半日神完氣足,下午三點見到睡醒無耐的落探員上線,為免浪費大好的一天假期便提議到飛鳳散散步,好提議!四點水浪窩見∼

散步路線「飛鳳石澗」,又一講十年都未行路線,十分精華的一條石澗,兩層瘋狂巨壁佔了全澗的90%,雨季賞瀑旱季攀崖,確實係一條值得再遊的精品。

隊員: Lok, Pui

 

喚醒了沉睡中的率性,1600水浪窩集合,遇到好多剛剛行完第三段準備離開的行友。

快步入榕樹澳大路,再見日漸消瘦的蛇仔,一星期見你三次都算有緣,影下你留個紀念啦,下次黎應該見你唔到架啦。

1630到達飛鳳石澗入口,好開始主打散步行程。在堤壩旁的竹林隧道入澗,條路開得好靚捐得幾happy,入到澗一影壩後水死潭後全速前進。

二分鐘即到達第一塊巨壁底。


觀察一輪發現塊壁都乾得七七八八,好多看來黝黑的岩石看似濕滑,其實只係陳年的水漬,直攀十分之可行。


一路沿著壁上較乾的石脊位快速上攀,乾壁黎講飛鳳難度比飛龍稍遜,好多斜壁位都可以就咁行上去,當然濕壁的話又是另一回事啦,分分鐘一野FreeSlide在壁底執返。


15分鐘突破第一層到達壁頂小潭,不作停留穿過一少段林蔭便到達第二層壁底,第二層沒有第一層那樣一氣呵成,明顯分左四五層,但一心諗住全破壁的二人一於少理,各自搵食見位就上。

爬落發現第二層難度較高,好多位都要避重就輕在壁上左右橫移鼠過。

但上到近頂處的微弧形黑壁,一個真.鳳飛倒仰位,由於太過懸空,心理壓力極大唔敢爬,最後唯有穿右邊小石峽繞過,接觸到大約三米的山邊小路,令到全破壁的計劃衰收尾。

1710到達壁頂,扯得太盡都幾疲,坐低小休吃茶點,有朋友系檸茶及86% 無糖黑朱古力,86%真係苦過DD,食完飲檸茶就甜到漏= "=

天還未黑還有景可賞,審視返前兩次行程既主打,計有石屋山、黃地峒、石芽頭及雞麻峒。休息10分鐘再起行,唔係黑齊就濕滯了∼

幸好最後一段澗道亦十分之友善,離開壁頂後只需穿過一長廊棧道便會在左邊發現離澗山路,這條離澗路堪稱史上最出,開到成米寬5K推前都無問題。

中途有分叉路,左路應是接麥徑出水浪窩,我們選走右路經過隱龍下沿落榕樹澳馬路,最後快步回歸水浪窩完成,精華兩小時行程!

這星期的三次行程加埋之前的飛龍隱龍馬夾崙,這一帶的主打山澗都七七八八,睇黎有一段日子唔會再黎住。總結數次行程,連遊雞公山群澗最佳方案是上溯飛龍精華段,原路下降再攀飛鳳石澗,右路出澗下降落榕樹澳馬路再上隱龍,最後落水浪窩完成。這個玩法算係幾順路的,又可以避開飛龍上源那段悶途,享受雙倍攀爬趣味,再者三澗皆是由下而上溯的,玩澗都係上好玩d,一次玩三條十分化算。馬夾崙坑?別太貪心了。

相關遊記:

2006年12月3日

返回上頁返回首頁返回頁頂

 

Email