|
 
＠十點西貢老麥集合購物，雙鹿高手Elmo登場。買完野打的入西尸灣，車費８０+。
＠西灣亭起步，經吹筒坳向西灣方向進發。沿途可遠望到萬宜水庫的景色。仲可以見到蠄蟝石頂起左面。
 
＠３０分鐘路程到達水清砂幼既西灣，西灣有士多可以補給。沙灘盡處進入雙鹿石澗，準備玩水。吹定水泡！
 
＠好快到達第一景點，四疊名潭，好多遊人。
 
＠過了豐水的季節，水量算OK。再一次怒攀四疊，要引身上身一次，攀一次就冇力。爬完就高台跳水！感覺到制空時間，有兩秒！！好驚！！
 
＠直壁冇力爬了，由右面上，都好玩。跳水攀爬游泳∼
 
＠玩完水再出發，之後是平緩的夾萬坑，隊員樂諗住泳溯，點知見到水裡有大蛇乙條…不久有支流，主澗轉左。
 
＠到達枯水千絲瀑，由於上源建了水壩，千絲瀑的水量已不復從前。只餘一巨型濕壁…期望見一次洪水千絲，睇黎都要黑雨後黎…
  
＠攀千絲正路在右面，手腳位充足。上到瀑頂！居高臨下！
 
＠千絲後的水壩…同樣要由右面攀越，小心浮沙碎石。
 
＠沿澗上溯，下一站鳴幽，瀑下有水潭成新月形，流瀑從潭沒之處流下，清幽！鳴幽係大休既好地方！有得遮陰有水玩又有壁爬，小休一會閃人。往藏幽瀑既路上又會有支流，主澗折右，澗旁草叢有平衡小徑。
 
＠越過一段平緩澗道後，會先左後右突轉，抬頭一看藏幽瀑已在眼前。
 
＠藏幽瀑全貌，有別於鳴幽的雅致，十分雄偉！手腳位充足，左正路，右亦可一攀。
 
＠藏幽瀑之上便是著名的石棧道。則面有長形水潭，失手掉落去都唔會死。
 
＠後段有個棘手位，諗住一腳踢個波上頂先空隻手出黎爬，點知撻Q跌左落去…
  
＠繼入馴鹿潭，記得第一次黎就起呢度鏟右面山坡出澗，好那美玲…大潭小瀑，十分雅致，仲有靚石台可以玩跳水，有個大叔表演跳水穿水泡，勁！開爐大休玩水！抖左成個鐘先再起步。
 
＠之後是井底瀑，十分高的瀑布，好似比千絲更高，而且水量充足！瀑中間有一層。但全瀑皆為宜崖濕壁，要攀瀑而上不太可能，應由右方山路繞上瀑頂。再來便是最後的奔槽瀑，此瀑深藏於峽谷之內，瀑成Ｌ字形，瀑左有路可繞上瀑頂。
 
＠今次就同隊員樂直攀瀑崖而上！手腳良好，小心跣腳就可以了。成完奔槽瀑至此已全溯雙鹿石澗，可接右方山路上鹿湖高原沿鹿湖郊遊徑離開。更多雙鹿石澗相片可以參考鹿湖北坑一役。
相關連結：
2004年5月16日 |
