|
＠八點半入到東涌。在法蘭西餐廳食早餐，食完入貨十點出發行去散頭村。
 
＠中途有猴王廟…貞子阿鬼入左去拜神同添香油，結果好靈呀！今日真係風調雨順！  
＠行左一個鐘左右就到左澗口既鞦韆潭啦，d水好清！不過我地冇起呢度落水。
 
＠在潭右行多一段山路先落澗。
 
＠初段平緩，可以熱下身，貞子跣低左…好采冇乜事，起番身就再行過。仲要行行下攞支力保健出黎飲，令我諗起Ｎ年前果個力保健廣告…
 
＠行左個幾鐘到啦，就到左摩天崖！由下面影上去幾有氣勢！
 
＠登此崖可走右中兩路，右方林路比較易行。趕左阿鬼同貞子去行右面。  
＠中路登正壁的話，在崖中間有一個懸空大肚位，只可腳撐斜壁，靠手力拉個人上去！而且呢個位置絕對係不容有失！驚險！
 
＠上到去既時候阿鬼果面都未到，原來佢地卡住啦，要放繩幫佢地。登頂大約一點，崖頂可以遠望到機場架，就地開爐大休。又有一個小潭起正隔離可以游水煮食！
 
＠仲有好多生果，今次掟唔爆個密瓜…個潭有好多泥鰍！仲捉左一條好大條架！本來諗住影相，但係影個時比佢走甩左…
 
＠辛苦哂 Ivan同史提芬煮野食同泡製左好多靚茶！山水湯麵！仲有菜有肉！正！
＠收拾行裝出發的時候，風擋比風吹左落山，要走番落去搵，可惜搵唔到，不過可以再爬多一次。咁又搞左一輪，起大休地點走果時都成四點，真係要走快ｄ…
 
＠再出發就要攀過小潭邊的鐵索棧道。
 
 
＠後段的澗道亦潭瀑不斷，每一個都停下來休息嬉水一會。
 
＠不過都唔玩得好耐，趕路呀！唔係天黑都出唔到澗就慘啦，溯到上游水都開始少啦。大約行到七點左右終於都出澗 lu，出澗接彌東古道，出東涌。
 
＠上到山頂，都仲見到機場架。呢條彌東古道在新地圖上面都已經無左，成條路都生滿哂草。
＠天都黑埋啦，睇唔到路又勁比草枝刮腳，好似火燒咁痛，又有好多洞比人踩…仲要突然落大雨，後段又入左墓地…過激！行左成兩個鐘，成十點幾終於返到去東涌啦…好餓，大伙兒去食麥記啦。去到麥記見到貞子隻手…花哂！！仲要勁似比人虐待完咁！！今日真係玩足全日！絕無冷場！！
2003年7月20日 |
