|
＠今日本來諗住去溯大圓石澗，十點終出發，十二點左右去到圓學園跟住上山路，一路都好順利（除左比狗追），一點左右已經去到澗口。
＠去到已經覺得唔係好對路，明明係大澗黎點解會咁陰森既呢？睇地圖又冇錯喎，於是行前ｄ去下一條澗問下人，點知果條友又話頭先果條先係大圓…咁人同圖都咁講都冇理由唔信既，點知咁就中招…
 
＠諗住行行下會越黎越開揚啦~ 點知越行越唔對路...但係又冇理由返轉頭架!
 
＠好多位都好難行囉，ｄ路好明顯係無乜人行過…
 
＠但係都唔係話無靚景既，呢度有好多短瀑都幾靚架，不過都無乜心情睇lu。大休，探下路先，順手涼下先。探完路發覺出面冇左路…條澗比草生到密左…
 
＠一路過關斬將！有瀑攀，有林鏟…
 
＠就係咁行左個幾鐘，黎到上面呢個位…手腳花哂，係咁比草界…都應該差唔多窮源咁濟啦，就起呢度向右面鏟上山啦…
 
＠上左三四個字終於上返山路啦！！
 
＠行返落山段路都ＯＫ靚架，可以見到城門同埋荃灣。返到落去分差路，條氣唔係好順，決定再過去睇下大圓起邊!!
 
＠原來真係下一條澗先至係…網上既資料真係唔可以盡信…下次記得要做多d功課…時間無多，驚太陽落山呀，跑澗，好快就到左銀花潭，開爐大休煮野食。果度有人整左d石台起度，好方便煮野食…＝ .＝
 
＠此處飛瀑從四方八面而下，長輩冠以九龍吐珠之名。再上為絕壁飛絮，為一十多呎的飛瀑，右邊有山路可繞上瀑頂。但係由瀑左源瀑上爬更加刺激！中間仲要橫過流瀑！望返落去都驚呀！
 
＠源途好多短瀑，好靚。黎到呢度見到太陽就落山啦，唯有源路退出…黑夜溯澗太危險啦…
 
＠行左半個鐘返到澗口，再hai多一陣先走，慢慢踱返落山…今晚個月光都好正，行返落去圓玄學院天都黑齊lu，好疲啦。雖然只係行左大圓少少，但係條澗既感覺好正，以後應會再黎一探。
2003年8月10日
相關遊記：
|
