＠連繼兩個禮拜兩條友輪流唔得閒之後，終於搵到大吉日子起行。
 
＠晨咁早九點就大埔踩去大圍，照舊，暉爺遲到＝＿＝！咁我就下鏈，喺沙田兜下圈hea下時間，十一點合會大圍車神…
 
＠拿拿聲踩上去大埔公路喇！踩落又唔覺大埔公路難上，斜度都幾friendly, 但係d車就唔係太friend底，係咁請我地食塵，去到九龍水塘立即鼠入去抖抖氣，唔係變肺積塵！
＠上到最高就立即落馬路，超爽，過左唯一一個燈口之後，沿慢線直沖落深水涉，沿途都有brake 住落，但係都可以同Ｄ車平排，太癲，一睇隻表原來去到５０Ｋ咁濟，快Ｄ都超速！五分鐘就到左北九龍裁判處，真係快過打巴。
 
＠首次踩住單車入鴨記，太爽！地鐵站門口留影，被途人歧視幾野後，都係繼續行程…
 
＠迷一般既大角咀小街小巷，大方向前進，亂打亂撞踩左入公園無耐就會搵到澳運站咧，暉暉既方向感實在太強！
 
＠係澳運站門口盤算左好一陣子，都係發覺突入呢個站既可行性最高，一來可直達東涌，免左轉車果陣畀人周到既機會，二來票務站得一個，盲點極多！
 
＠最後我地選左閘口右手邊既玻璃欄運送部單車入站，成個過程係無人察覺到，咁就拿拿臨抬部車落月台，頭卡上車，突入之大成功！！！
 
＠地下鐵話咁快就到，學生半價，贏埋，真係唔好意思喇 ＝．＝Ｙ
 
＠一點半到東薈城，買個老麥餐去東涌遊樂場吹吹風食個lunch，真寫意。
 
＠二點半起步東大古道。好彩禮拜六無咩人行，可以時速廿幾公里咁去，但係Ｄ彎都幾多，有一兩個位我都反應唔切沖左出路，好彩係草地，唔係炒車就好笑囉。
 
＠去到散石灣上深石村段斜就最辛若，Ｓ字咁踩都踩唔到，最後放棄，推下車…
 
＠但沖落深屈就爽到爆，極速三分鐘到碼頭，中途發生離奇飛車事件，嚇鼠暉暉。
 
＠古道臨接山路一段石梯，無計唔係越野車，要慢慢抬，膀頭爆裂！
 
＠最後落山路飛蹬落去，勁驚爆胎，雖然最後都無事。但係大圍車神玩得太開心，轉個彎位成部車反左，笑那死我。
 
＠一個鐘頭兩個字就踩到大澳lu！
 
＠踩下入村，過下橋，逛下街，感覺下漁村風貌，唔錯唔錯……人就多左少少，但係勝在踩單車入黎夠特別！
 
＠踩番出巴士站，搵番以前食豆花間士多，無以前咁好食，都係出去海邊吹吹風。
 
＠聽聞大澳既石堤起好之後，變左呢頭既新景點，真係唔錯，好直既一條路，慢慢閒踩就最好不過咧。
 
＠再接鳳徑過二澳，記得上次嶼南遊行呢段都行左半個鐘，今次單車十分鐘唔洗到左，耶！但係之後就濕濟Ｄ，轉山路，推多過踩。
 
＠過煎魚灣途中遇見一班行友，話半個鐘之前又有隊人踩單車，今日都幾多單車友喎…
 
＠去到潮漲，又見唔到雞山沙堤，都係等下次，真係唔開心。仍舊山路，慢慢推車，出沙灘抖抖，突然記得番過分流西灣既路係石屎路，就拿拿聲出發喇。
 
＠初段係咁上，上到腳仔軟，之不過先苦後甜，沖落西灣條路一級梯都無，直落，沖出沙灘睏低左，yo……
 
＠最緊要抖下，唔係再踩實老抽。沿鳳徑過埋引水道，唔經東灣，可以上少幾廿米，呢Ｄ時候真係慳得就慳。
 
＠喺咁抬車推車先去到引水道，真攞命！
 
＠出口有個警告牌寫住「任何腳踏車嚴禁進入此區…」依！咁我地由呢度出黎姐係無事啦，耶∼可以繼續！
 
＠沉悶既引水道，聽住歌踩好好多，中途見到神秘廁所裝置，應該係風力發電果類啦，但係個廁要電黎幹麼？！
 
＠半個鐘就到左石壁，接多次引水道就到東涌道。
 
＠天又開始黑又無奶力，都係放棄北大嶼，上伯公坳閃人。
 
＠就係呢個時候，我地終於遇上同路人，一問之下就係同我地踩同一條線既果班單車友。佢地真•土法單車遊，東涌租車，部部鐵架，簡直係體力既磨練，無得比！
 
＠可能佢地有Ｄ踩唔慣長途，上伯公坳途中有兩位車友頂唔掂檔，要 call白車上去，型，第一次見白車入面放單車！李暉亦都因為成日食左個老麥飽，頂唔順無力踩，要慢慢推上去，之後又係伯公坳暴寒，要係白車隔離取暖，哩到呢……救護員哥哥仔見我地都唔夠水，請我地飲救命水，幾攪鬼一包包咁。
 
＠續繼落東涌，照舊偷運入站，去到澳運站再踩去旺角火車站，因為果頭多人，閘口又多，畀人周中既機會實細Ｄ啦，我地仲要入閘果陣等票務處Ｄ人有野做緊先沖入去，策略相當成功，上埋火車都無人覺，慳番廿雞，真開心！
2006年3月11日 |
King
