|
＠晨早大埔集合早點購物。
 
＠二人之遲到技，於是買外賣入大尾督對住個海開餐。碼頭有好多釣友，不停有魚上釣！好勁！！食埋野坐多一陣就人齊開船。
 
＠直出赤門海峽，路過黃竹角咀再入直門頭，望住眼前既往灣北頂，連高手都縮沙，決定取消登峰行動，都好既，往灣北頂留返泳渡一登才夠意思。
 
＠仲見到麒麟石，又係有機會要騎一騎。過左往灣下一站就係墳洲，印洲塘西面的其中一個小島。
  
＠全員閒遊模式坐小艇登島，沿岸邊逆時針走一轉，島上唯一的建築物就係呢一支類似路牌既東西。墳洲形狀有Ｄ似雞脾，行到去北端雞脾骨既位置有一道石脊可以一登行個大運。
  
＠石脊中段道闊半米，起上面行要步步為營，落返黎既時候隊員樂懷疑被生秀鐵釘貫腳，還留了少許異物在傷口內，稍為檢查過後決定繼續行程，上船先慢慢搞…＝＿\＝
 
＠尋龍點穴，走到岸的西岸找尋墳洲上的墳。起初見唔到路上，好彩無睇唔開爆上去，行多兩步就有靚路接上此二穴，哎打搞哂！上到去發現滿地紙錢，想必剛剛的重陽有孝子賢孫黎過掃墓。這兩個墳外貌仍很簇新，都是曾姓的，睇書話係荔枝窩的祖墳。
 
＠在墳旁眺望對岸的鬼洲，行友話右方的岩石形似骷髏，但睇黎睇去都想像唔到。
 
＠好快就行左一個圈，返去會合駁艇，準備去下一站鬼洲。墳洲的石灘上有好多玻璃樽，提防提防。
 
＠有行友打算水路進發，泳渡過鬼洲！？真吸引。坐船經過一絕對平面的小島排，仲有人在其上垂釣，超有孤島Feel。後方有如兩隻凸眼的是大小稔洲。
  
＠登陸鬼洲，一見個鬼頭，癲哥哥又技癢要露一手，又唔知自己踢緊拖，嚇鼠阿叔。
 
＠島上岩石特寫，風化水蝕情況嚴重，研究過後得出既結論係癲佬應該會攞錯鬆既石跟手FreeFall.com。過得一頭半載就會好似呢條魚一樣。
＠鬼洲望返墳洲，好似有兩隻眼咁＝＿\＝。仲見到一隻離奇之狗在墳洲上蹓躂！島上一個人都無，隻狗理應係泳渡過去！好癲！！！
  
＠又行一個大運，準備離開，此時癲哥哥才脫險歸隊。
 
＠下一站印洲，又返入印塘，估唔到第一次登陸印洲黎來得咁輕鬆。
 
＠近睇個印爛得都幾衰下，繼開果支得返一條石柱。
  
＠眾隊員意圖試攀石柱，但觀察一輪後覺得玩唔過，都係收手。觀念之時已經有團友在後方攀上印的主體。上到頂發現有一棵小小的餘甘子生在印頂！全株掛滿累累果實，莫非係神品！？必試，入口初略帶苦澀，但食完之後會留下絲絲甜味，好有趣的果子！！
 
＠在印洲頂望向西流江，嘩好近，泳渡之可行100％下年天清要再搞一搞，在印洲整返張印洲塘既360度環徊全景圖，應該會幾出色！
 
＠三條友最後都係忍唔住要落水玩一玩，澗水走出印洲對外的一個石排，有導航柱一支可以一登！
 
＠玩埋印洲返上船大休午餐，久違了既有錢人玩法，當大家咬緊乾糧既時候竟然使出煮食計劃！！帶左Cookset都唔使用，可以用船上既爐，對住筆架洲整野食真吊！！
  
＠豐富到呢！金菇五香肉丁蟹柳仲有Kona為癲佬預備既爆漿丸子。驚死唔夠食買得太多麵，最後都係食唔哂收場。
 
＠雖然食得太飽都不適宜，但係黎到筆架洲又無理由唔一玩！強襲筆架！為免溺斃都係一人執返一個水泡保命先。
  
＠成功登陸筆架，可以在筆架中間的位置攀上頂，其下有一個通隆位，但係摺唔過個人…上攀頗考功夫！岩石很碎，隨手一塊都可以扯出黎，要試清楚先敢用。
  
＠筆架洲的洲咀，一層層的沙紋，幾靚。筆架上行走，經過險脊在另一邊下降。
  
＠再走去沙咀度玩，發現大量海星，上次去爛排無玩，今次要整返張。小妹妹都忍唔住要除鞋落水睇海星。仲有ｄ奇奇怪怪唔知係乜既生物。
 
＠玩完筆架洲，船伕叔叔介紹可以去吉澳高排果頭睇珊瑚，於是一致讚成。
  
＠果真不負眾望，發現大量七彩繽紛的珊瑚，成班人一上一下咁來回海面同海底，要影珊瑚就要同浮力對抗！唯有在海底搵ｄ野抓實先可以對到焦！！就係咁打發埋下半場既時間，玩到四點左右就回程，超級清閒的一次旅程。
2005年10月16日 |
