海岸探奇 Coast Trek

  海岸探奇目錄
  偷渡系列
   
   
   
   
   
   
  返回遊記目錄

 

嶼

海下賊船

藍天白雲既一日,竟然無人Plan去玩,直至昨晚先突然話去海下浮潛,再去猴塘溪玩開爐大休。起酷熱天氣警告之下呢個都不失為一個好提議。傳說入面仲有獨木舟可以借添,如果係就大把野玩!但係最後既結果係乃左一鑊咁既…

隊員:Pui, Lok, 鬼, 威, Elmo, 公, 棠, 珊達, Bun, Winnie, 特倫

 

西貢早點後,購入浮板三塊準備充足地去海下浮潛。由於Team B 尚未人齊, 於是Team A 四人先行出發入海下玩住先。

西貢小巴總站有車直入海下村,村內有好多用品可以租用,潛水用品、艇仔、獨木舟,不過連更衣室同廁所都要租…

水漲既關係,入左村過唔到沙灘,行返上馬路再經廁所落沙灘,中途見到一條大澗下游,好似幾好玩,唔知係乜澗。諗住沿澗下降出海,點知行左幾步未熱身既珊達竟然製造驚險鏡頭玩左一野失足頭撞大石差d毀容。

最後都係由上返去由正路出沙灘。水漲關係沙灘變得極小,加上灘上有好多人集合左起度,好似係玩緊野外定向之類既東西。所以我地第一時間就閃左出去海中心既一道沙堤上面。

好精緻既沙堤,登陸堤上放下行裝小休睇風景影相嬉水玩沙。
極好天既一日,呢d天氣唔出海玩水真係哂左,可惜今日船河Full左無得去。

沙堤四周既水都係極淺,大概都係到腰至心口水,不諳泳術既阿鬼大可在這裡安心嬉水。玩完水上返黎砌沙堤,本來係想困住d魚仔起沙堤入面,但係未砌好d魚仔已經閃走哂…

玩到咁上下Team B既隊員終於到達,仲出動埋賊船乙隻!!有船就唔同玩法就,極想撐出去外面既小島玩或者去下串螺角角咀一遊!

由於獨木舟實在太過奢侈,要成100蚊玩一日,只好退而求其次出返首得三根釘既賊船啦,但係都已經比冰火號進化左不了啦。

歡樂滿賊船計劃,超載負重200%。 成功出航,以50mm/s既速度前進。

船伕A。        隨船行李A&B。   自力更新海中漂流既珊達。

由於超載既情況太過嚴重,航行既速度真係慘不忍睹,好多隊員都落水靠自己。


幾經辛苦終於去到第一個目的地,海灣內的一個小石排。順風撐出黎都已經咁辛苦,一陣返去死梗,可惜當時除左阿Bun,大家都未有呢個意識…

登陸一剎太興奮,未睇清楚就爬左上礁岩上面跣左一野跌左落d蠔殼度,雙腳既內側爛哂爆左十多條血痕出黎…=_\=


好彩只係皮外傷,由於要等止血既關係,只好呆在石上睇其他隊員玩,真係唔開心。

離開小石排繼續往串螺角咀進發,在咀旁一沙灘泊岸,固定好小艇先去玩。

但發現岸邊極多水雷,再加上灣內既水質比想象中差好遠.心中既能見度極低,一來無野睇,二來要避開水雷就更難!先後有三四個隊員中招,十分掃興。

時正兩點,發現我地唔記得左要食飯呢一回事,於是落船匆匆玩左一陣就開始回航。點知回程呢一段先至係最甘既一段…

繼續超載計劃,但係起逆風既情況之下簡直係串步難移!稍一鬆懈更會被強風吹回岸邊,一眾隊員見此情況陸續棄船逃生,引發了逃亡潮,更帶走了所有浮具…=_\=

最後只餘下報稱泳術不良既三位隊員苦苦堅持下去。點知禍不單行,一邊既槳扣竟然突然飛脫跌左落海!!對於四位在海上無助漂流既隊員簡直係雪上加霜,由於兩邊撐船既力道變得極不平衝,令到小艇經常出現非控制性轉向,加上強風接二連三的將我地吹返轉頭或打埋島,情況已經到左聞者傷心既地步。

唉,呢個時候唯有隨水漂流嘆返個熱騰騰既西瓜先啦。極出色既瓜,起沙架!!

點知食食下真係發現唔多掂,小艇後退既速度真係太快,繼續撐呀!!!!

而另一邊逃脫既隊員已經安全上到陸。睇黎仲玩得好開心咁添。

最後小艇成員搞左成四個鐘,六點幾都係去到一半返唔到埋岸,如果唔係要交船相信都唔會有人黎接我地。

2005年7月10日

返回上頁返回首頁返回頁頂

 

Email