|
＠當晚十一點大埔墟集合，之前同阿樂阿鬼出沙田買定呢兩日既補給品。等齊人就打巴入大尾督再包兩架的士入烏交騰。夜入紅石門，經上苗田上橫嶺、過觀音峒在紅石門坳下降紅石門，感覺極漫長的旅程…
 
＠特別係落紅石門一段，Full Gear既情況夜晚穿林感覺真係太差！！幸好無行錯路，十分順利咁去到紅石門。經過廢屋，決定唔落營去海邊露宿算數…
 
＠一度受潮漲之威脅，睇住Ｄ水係咁漲上黎湧入堤壩入面，撤退至堤壩上睡覺，成隊人打橫排開睏哂起壩上面，極高難度既動作，一個反睏跌落旁邊化骨池就開心死。
 
＠睏覺既環境太差，Feel到一邊睏一邊有Ｄ水甴曱呀、小昆蟲之類係咁典上身。一早成班人就彈哂起身，結果只係睏左兩個幾鐘，只有睡魔上身既特倫可以一直長眠落去…
 
＠起身第一件事黎個下水禮，０５年冰火第一擊，閒盪一下紅石門，不過水質真係好差。另一邊則有隊員享受垂釣之樂，在堤壩上隨便下餌。
 
＠嘩，中毒太深，有一條因水質污染變異既魚上釣。
 
＠玩完水就同競競去攞水整早點，呢個時候見到個太陽從山後升起，被煙霞添上一片灰…先去一試紅石門後方水塘的使用可能性，搞左一輪，攞上黎Ｄ水都幾多雜質下，決定行遠Ｄ返去上方的水塘取水…好遠…仲要晨早同芒草搏鬥多一鑊…
 
＠堤壩上享受一個豐富既早餐，杯麵Ｘ１０加五香肉丁。食飽就出發！！開始今之行動既主打部份，準備強登往灣！！
  
＠上一次由導航柱泳渡，今次人多都係搵返最短既路線，泳渡之前先將唔需要既行裝收藏起岸邊既草叢入面先。起身無耐經已始水退，將海面既油污同垃圾沖走左大部份，唔係既話真係唔係好想落水…
 
＠冰火號再一次發揮其運送行裝既功能，但係頭先玩左一輪發現佢都有少少漏氣…不過頂幾十分鐘應該問題不大。出發，由隊員樂帶頭，後面跟住一條橙色人龍！好好睇！！
 
＠成班人唔知做乜有直線唔游，向右大斜線咁去，搞到游遠左好多下＝＿＝。當然最後都係平安無事全隊人登陸往灣洲，牌樓留此一遊合照計劃，塊板好似裂裂地…
 
＠繼續行程，向右方沿岸邊前進，中途經過往灣，遠觀ＯＫ，近睇發現都係成個灘係垃圾。中途都留意到一Ｄ類似上往灣西頂既路口，但係酷熱既天氣之下登頂實在係令人卻步。繼續綑邊，見到外展營啦，仲有船泊岸，可能有人入營玩。
 
＠到達營地，全走海邊平路ＨＰ經已下降３０％，好嚴重，營地環境都唔錯，有一小片草地，在營中小休一會，好彩可以使出淡水沖身計劃吊住條命。與落船既一伙人相遇，如來係旅行隊黎玩∼
 
＠繼行，回望後繼行，回望後方的往灣西頂，得果百零米既山頂，但係由水平而起睇落個勢都唔錯，見到剛剛的隊伍正開始登山…睇到都辛苦，但係估唔到我地一陣都係逃唔出呢一個厄運。過左一兩個灣仔，發現石堡壘出現在山坡上，型！！
 
＠雖然離開海邊會有熱死既危機，但係總唔可以讓行程無為下去，決定一登石堡壘。在正下方的路邊有一舊大石，呈屋簷狀正係大休既好地方。原來巨石仲別有洞天，穿過巨石組中的一個石穴發現後方有登石堡壘的山路！！
  
＠頗斜既路，一步一步接近石堡壘，中途一個開揚的位置大隊忍不住小休一會，全員呈撻皮狀，睇黎情況絕不樂觀…休閒十數分鐘再起步，去到石堡壘底部，起初竟然搵唔到繼上既路，原來係要沿左方山路退一段先，右方就會有路接上石堡壘頂，一時驚愕。
 
＠石堡壘真係好出色既一座巨大岩組，稍稍行出兩步經已係絕崖，呢Ｄ攀岩線習線，我地Ｄ土法都係收起算數唔好亂黎，同埋以今日既狀況玩野應該會Free Fall.Com。
＠成舊野有上中下三個石台可以行出少少影相，三個位置都係極開揚。更上一層樓上到最頂影一個往灣海岸，如果繼續綑邊既話好快都會去到滅角咀。
  
＠在堡壘後方的樹蔭進行午餐，順便討論一下下一步既行動，對東灣始終有份執著，唔想令計劃多時既往灣之旅變得無為，但係隊員狀態經已跌到落谷底，食水亦開始出現問題，再苦苦糾纏落去只會徒添悲傷。
 
＠上到山脊更發現落東灣的路充滿著密林既試煉，這麼近那麼遠，原諒我未夠誠意，只能夠說一句：「別了，東灣」…
＠在石堡壘對上山脊觀察往灣地勢，北頂感覺上好惡，睇黎真係要有所覺悟先再回來一登，遠方西頂之下見到執毛洲，唉…
 
＠好不容易下決定心離開，唔想行回頭頭落返海邊，沿山脊隱約的小路往西面撤退，點知再中多左招，烈日下暴走枯叢小路，翻過兩個小丘後小路引入一荒坑…要估唔到點都要再林藝一擊，意志崩潰，行屍走肉式推進…經過半小時的搏鬥，終於由荒坑爆返出海邊！第一時間跳落水，感動重生！決定就地大休一小時！展開浮衣在海上漂流睏覺！！
 
＠大休至二時許，收拾心情回航，返到營地再一次使出淡水沖身技…咁都無比營地既大叔少，真係好人…沿路綑返去紅石門，再泳渡一次，今早的旅行隊去左紅石門對岸，正好欣賞一班呆子渡海。
 
＠渡海後收拾返今早放入低既行裝，打量緊Call船接走既可行性，第一件事就係同旅行隊交涉，睇下有無順風船撘，可惜事敗。唯有打比和哥哥求救，但只能聯絡到一個船家，要成６０蚊去三椏村！？完全唔理小眾隊員既意見貫徹窮人玩法，暴走返烏交騰！
 
＠決定打通上次欠缺了的一段路，沿海邊對上少少的林路接返苗三古道，越行越遠，好辛苦呀！好彩去到黃竹涌澗口竟有一口清池！！
 
＠冰涼既澗水洗走身心既疲憊！！簡直係全個行程最出色既景點！！好不願意離開，繼續暴走夜行林路，電筒唔夠部份隊員要摸黑前進，最後出到烏交騰成八點幾，再打的出大埔食飯。
＠同樣既紅石門往灣，兩個星期之內經歷左今年最出色同最無為既行程…
＜一路想死＞
作曲: 周杰倫 主唱: 賊船死士 填詞: mazzy
印塘平靜的世界 越來越遠的路線
我夜上橫嶺 夜景還是很美
卻有種差感覺 旁邊就是污水
石堡壘下面排徊 紫外光加上缺水
東灣的方位 太明顯需要林藝
體力一直在減退 鬥志崩潰在郊外零碎
我一路向北 泳渡開始已疲倦
我說我好累 腳軟軟的欄上水
無風在路吹 搞了半天最終證實是無為
細數傷痕 我傷膝幾回
在泳鏡裏的世界 越來越髒的海面
船轉身排水 海面汽油刺鼻
雙手機械划水 只想閉上眼皮
在往灣對面排徊 是我錯失的機會
船停的方位 跟我中間隔十里
街渡一直在逃避 意志在回程宣佈離世
我一路撻皮 離開已經是四點
我說我好累 六十塊我也願給
賊船多窮鬼 一打開錢包沒有一張紙幣
細數硬幣 我決定省回
我一路想死 離開往灣的季節
夜行的範圍 大不過我的後悔
我加速超越 卻甩不掉緊緊跟隨的傷悲
細數傷痕 我傷膝幾回
停止狼狽 就讓錯純粹
2005年10月1日 |
