|
＠九點陳權早餐團，購買補給品後五人打的入白腊起步。
 
＠步入白腊灣旁士多整理行裝時，突然聽到士多阿叔大叫有蛇，眾隊員即刻過去奏奏熱鬧。圍埋去果然見到條紅頸，仲咬住隻大過佢個頭既青蛙。被六七條友圍觀住佢應該都幾不安，但係到口既午餐又無理由放棄，唯有全程比我地睇住佢慢慢吞哂成隻蛙，呢個時候條蛇堪稱係零攻擊力…有個阿叔仲走埋去扯佢條尾，好出色＝＿\＝
 
＠睇完變變變生命力就白腊灣再起步，離奇好天既一日，藍天白雲絕讚。經已遠望到白虎山，右轉去到沙灘盡頭開始綑邊之旅。初段邊線十分平易近人，都係碎石海岸，少量攀爬而矣。
  
＠中途有一石灘，灘後爛鬼石峽一個，算係初段較有睇頭的了＝＿＝石灘小休發現巨形浮物極之好玩，放在海面穩如泰山爬上去來個海中漂流，可惜形狀四四方方，如接近船形就一絕。
 
＠竺師太隨手在地上拿了件浮物，之後睇黎開始要泳渡了。水勁清決定要撻水一記，點知第一跳就泳鏡失縱，搜索左一輪都唔見左真係唔開心。唉唔理攞癲哥哥個鏡玩算數，同師太一登旁邊的石排頂。
 
＠兵分兩路陸路橫攀，水路一野就游過去，轉個靚灣竟驚現正景，離遠見到海邊一道黑崖飛流，一時驚愕！
 
＠即刻走去瀑底望望，前陣子的大雨仲做到野，飛流還有不錯的水量，全員站在瀑下享受冰爽既水力按摩，洗滌心靈。
 
＠繼行，到左一個人稱陰陽壁既位置，Feel唔到點樣陰陽法，只有一道長長的水道，黎講段路唔落水應要終極橫攀，都係一野跳海游過去方便得多，水極清，正！
  
＠翻過一個咀出現一個頗大型的環形海洞，洞前水深可以肆意撻水！入洞一探無乜料到，回影洞外終極藍天！
 
＠要繼續前進只有水路一途，要游返十零廿米，比機會競競玩一玩個海。
  
＠路過一個大石排，順手一登。之後再經過一個極淺既海洞就到左地圖上標示係鎖匙扣既地方。
 
＠風景唔錯，睇哂成個鎖匙門，對岸既伙頭墳洲看似十分之近，上壓應該係2xx米，距離ｏｋ，土法登遊伙頭墳洲真係十分之吸引，但係鎖匙門船來船往咁，又諗到隔左一兩個島仔經已係大海無盡，一陣游ｄ乜野入黎就唔好啦，呢個泳渡終章都係擱置左佢吧啦。
 
＠過匙扣後又一小海洞，洞口形狀都幾得意，有ｄ似木棉，但入面都係惡蚊既國度，不宜久留。在鎖匙門口發現一石峽，外面望入去無乜料到只見到垃圾一堆，但有心入內一探既話絕對有回報，由峽內回望出海，可以得到左右雙壁對立加上無敵藍天的壯闊景觀，相對之下峽外的三粒豆豉係幾咁渺小。
 
＠返回峽外唔知做乜突然小休，幾條友仔圍住條石隙浮潛，趕左一大堆魚仔入去，潛入一去望過百條起面前徘徊，又燈又黃咁好好睇。
 
＠除左魚仲有爛鬼珊瑚同海葵…一個操心大意既隊員一手按左落果堆濕滑既海葵度，嘩感覺好差呀頂＝＿\＝。
  
＠再起步，穿過小道小走廊，黎講真係要大退先可以咁行法，另一端既出口就有水行唔到了，要爬返上右方岩岸去。
 
＠可以遙望對岸的尖石柱。下一個景點「真．鎖匙扣」，一個呈問號狀的石台，十足十一個鎖匙扣。
  
＠黎講時間都唔早，於是在後方石台大休乾糧午餐，石台上有一條咸魚，師太見狀黎手就掉走左，開頭都不以為意，點知食食下野見到有ｄ野起頭先條咸魚個位典下典下，細看之下…Happy＝＿\＝好彩都差唔多食完野，競競仲咬住個包痴埋去係咁Macro，真係頂佢唔順…
  
＠食完野再起步，坐左咁耐哂到興哂，都係水路降一降溫先。又有海洞，洞前還有三疊潭，第一層離水面高左成米，之後又再升起一兩個小池。
 
＠竺師太示範生蠔食法，嘩我真係接受唔到將呢堆鼻涕狀物放入口。
 
＠再來便是「五個子彈窿」，想當年船河第一擊小的的曾經介紹過，記得果時仲問佢點解得４個，今日大退一遊果真係有五個子彈窿。洞外小休，石簷下乘涼避暑十分舒服。
 
＠到達南風洲之前又發現有野玩，行過左都唔知差ｄ錯過左呢道積木石橋，即刻返轉頭一攀，一登岩石塊砌成的橋頂，看似搖搖欲墜實則穩如泰山。
  
  
＠上到去發現原來有前後兩道橋，下方還有通道可行，即刻同競競繞返去最前一探個橋底，橋底又分上下兩路，下路極窄好好玩，要則身先過到黎講。
  
＠玩埋石橋都差唔多進入行程既尾聲，路過馬頭環時地上有一遍漆黑岩石，小休之時Sylvia又跌落昏睡既深淵，真係辛苦哂。
 
＠黎講馬頭環雖則細左ｄ，但都幾水清砂幼。在馬頭環的盡處停下了腳步，盤算著玩唔玩埋南風灣，在各隊員都有所覺悟既情況之下決定快速ｋｏ埋佢。
 
＠竺師太決定留下幫我地看行裝，泳渡廿幾三十米，水位剛剛過頭問題不大，搶灘後四人用跑的速度五分鐘唔使完成轉島，零景觀的一個小島，完了。最後收獲竟然係在島上執到一個咸超水泡＝＿＝，即刻套上身玩唔等。
  
＠游返過黎既時候發現唔係好對路，游極都係咁淺…原來在旁邊位置有一道水底砂堤＝＿＝，可以就咁行過去，早知頭先唔洗游…連南風灣都玩埋，係時候收手綑埋返去東丫，在東丫前的岩岸拾獲痴兒一件＝＿\＝頂唔用腦架真係黎追龍。最後一段放棄綑邊，全員慢慢隨波逐流地流返去沙橋頭個沙灘仔，超舒服。
 
  
＠在東丫沖洗一下後便沿海邊經北丫接出萬宜路，以６ｋ速度逃脫。
 
＠在北潭路口剛巧遇到９４經過，司機十分考人咁比我地上車！！服務態度一流，打巴到麥邊實行順風車計劃，大讚！！
2006年5月26日 |
