|
＠話說出發前一晚隊員樂再研究宣傳單張，發現中計之可能性200%up，可能行程並唔係我地想像中咁，上半場係閒盪深圳巿的筆架山公園…雖然係咁，但我都仲對是次既旅程抱有一絲絲希望，起碼下半場都會做到野呱…
 
＠一早過關到深圳集合，遲到者眾，一向準時既胡女更遲得太多而慘遭遺棄…人齊後就被引領去登車，旅遊巴在深圳巿中行駛，十數分鐘後就見到筆架山…公園…出現在我地既右手邊…心情不禁沉重了一截…一眾情緒低落既隊員唯有自娛一下，一入公園發現有類似東涌果個噴水設施可以一玩∼
＠起行之前大會就召集團友影返張團體相。再解釋一下上半場既路線，就係可以一登公園內既筆架山孖峰，兩個加埋都有二百幾米架，算係咁啦。
  
＠登山前加插溯澗攀瀑環節，沿公園石級靚路先步至右方的１７Ｘ米高主峰。
 
＠山頂門庭若市，有觀景台同餐廳。
＠觀景台眺望深圳巿。
 
＠再去埋副峰。無野玩唯有搞事爬下牆。
  
＠幸好被龍哥喝止，唔係癲佬可能被阿威掉左落山。玩左一陣就被鴨仔趕返落山準備撘車閃人。上車之前在公園內蹓躂了一會，其實個公園都幾靚，有好大片草地同埋都算管理得唔錯。
 
＠睇返公園導遊圖，我地大約玩左２０份１啦。仲設置左兒童樂園似的東西，七彩繽紛好有童話Feel。無耐就要撘車去下一站梅沙食個風味午餐。
 
＠車程都成個鐘，目的地是位於半山的荔景山莊…
 
＠量極多，但係唔見得有乜風味既午餐。好哩地一開始上菜極慢，又唔知有幾多個送所以係咁食飯，到後尾食飯食飽，有成四五個送原封不動。食剩咁多野一事一度成為其他團友茶餘飯後既話題。
 
＠酒樓內的一大特色，有韆鞦搖椅玩，限坐三人，特倫被拒諸門外。山莊的一角還飼養了一系列的家禽，剛剛食果隻可能係佢地個Friend啦。
  
＠食飽後成點幾兩點先開始登山，由山莊後山的小徑出發，接上半山的馬路。
 
＠幾特別既一條馬路，係咁打蛇餅Ｓ形咁上山，好新淨，仲靚過大帽山果條。
  
＠跟馬路行打蛇餅其實行多好多路，即便龍哥以旅聯的身份勸導眾人，雖然好驚，但一眾我行我素既隊友都係一於少理，自行抄一個捷徑去了，打下林小攀一下。
  
＠又遇上一個崎嶇難行既捷徑位，唔理領隊既勸籲終於受到教訓，滾左兩件落山，仲引發保齡球式攻勢，ＫＯ左下面路過既行友。
 
＠上到半山位置，依舊係無盡既公路賽。
 
＠到達水庫，一眾賊人脫離左大隊自行閃左去水壩度玩。
 
＠鹽田紅花瀝水庫。
 
＠堤壩旁小屋。
 
＠之後再去大橋下一探，有一道山澗可溯。
 
＠深秋仍有不俗水量，小潭小瀑倒是雅致。
＠繼續沿馬路上行，到達一分叉路口，左方可以遠望到梅沙尖頂，但係工作人員竟然話今日唔夠時間上頂，去到呢度就要折返…心中實在很幹…遠觀近頂位置有三數個自由行友正在登頂，好像頗有趣，估唔到行左個幾兩個鐘馬路去到呢度先話去唔到頂…太吊。更差的是…要原路步行返去起點荔景山莊離去…
 
＠返到去山莊剛好有工人採蜜，可以觀摩觀摩。雖然對秋蜂誤仍有戒心，但好彩只係Honey BeeBee，唔係YellowBlack Bee，可以放心ｄ一影群蜂亂舞既情況。
  
＠藝高膽大既工人，徒手零距離接觸BeeBee，工人將塊狀蜂巢上的蜂蜜抽走，剩餘在蜂巢上的蜜糖則可以任由遊人取食。一試未經提煉的蜂蜜，帶極濃既果香味，不過真係好鬼甜，食幾塊就覺濟。
 
＠最後四點幾在梅沙撘車離去返回深圳巿…就係咁失望地完成左是次行程。返到香港決定去打個任食老邊，將一口怨念發洩在肥牛之上。之後再研究多次旅聯的宣傳單張，行程完全無錯，只不過係我地太過天真。
2005年11月20日 |
