|
＠十點上水新都大家樂見，食飽起步先遊掃管甫的亨心樹，掃管甫就在上水中心旁邊，十分易搵。
 
＠要得知亨心樹既資料可以去商務打下書釘攞本奇異遊望下…在公園找了一會就見到該樹，扭麻花咁中空左棵樹，都幾有趣。
  
＠睇完亨心樹經北區公園去到靈山山腳的寺廟，就在廟後穿疏林而上，由於爆極都係得２０米，好放心想點搶攀都得，上到頂除左見到三個關二哥竟然在一旁樹叢間找到標高柱！可謂行動大成功。山頂零景觀，行另一條路落山，在山腳又見到一個石碑，但無留意寫乜。
 
＠經過靈山村返回大馬路，經過烏鴉落陽及小坑新村直線接近馬頭嶺。中間當然唔少得比村否歡迎一番。
  
＠在小坑新村的榮發石廠旁邊發現有登山小路，中途遇有分叉路向上行就ｏｋ，咁就可以一直上攀登上馬頭嶺山頂，山頂上長了一棵孤獨的小樹。
 
＠馬頭嶺上終於看到華山山脈上連綿的舊軍車路，驟眼睇真係有ｄ長城Feel。踏上軍車路，原來好多位都極斜！！要使出倒後落山先得。
 
＠在主脊右邊的小支脊盡處有一巨石，見有時間閒遊埋佢去右脊既時候會穿過一ｄ破舊既靶場圍欄，經已可以自出自入。在巨石處可以近觀黃茅坑山，過多一排應該會填到山頂都唔見埋，
 
＠去到石岩時殿後來電話經已臨華山之癲正等待會合我們，於是三人發足狂奔上華山。
  
＠紅紙三封成功入手。華山下方就係練靶場，在路邊見到有靶紙一塊，可以變身移動活靶。華山頂見到覆雨翻雲碑，係咁２抖抖再起行。
 
＠一路向北，繼登松山，華山山脈真好，一下子就可以連登幾個路旁山頂…下望華山村找尋星之碎花老巢，如此塞外小村竟建有一間學府，難怪可以造就阿花如此人材。
  
＠黎到華山山脈最後一個長甫頭當然都唔會放過，可以先行一段掃墓小路，之後再踩草上頂，山頂被鐵絲所圍，另一邊又係練靶場同禁區。
 
＠沿鐵絲繞去靶場的另一邊，中途突然聽到樓下廣播「今日既捉蛇行動正式開始」…以為話我地，真係比佢嚇一嚇。
 
＠離開長甫頭沿馬路下降虎地坳繼續往大石磨前進，去到鐵路既時候ａｂｃ終於追龍而至，１２點幾先放工再全走華山山脈追黎，真速度王也。
 
＠同火車中既乘客Say Hi，之後在火車軌下鼠過去，再行大型輸水管過河。
 
＠兩條友唔知爬上去做乜，搞到成手都係塵。過河後有分叉路，小心唔好行左佢禁區果面。
＠轉入排頭路，有好多類似貨倉的東西，之後搵到一舊車路上山，上少少經已可以睇到深圳巿的大厦林立。
  
＠十分撻皮的路，好鬼斜！！車路盡頭可以去到一座荒廢了的建築，隨便入內參觀又發覺十分新淨，奇怪奇怪，係一個宿營既好地方。
 
＠走兩層樓梯上天台休息，風景唔錯。
＠遠望返華山山脈及羅湖一帶，火車在梧桐河旁行駛，加埋五顏六色背景，幾好睇。但係近觀既話梧桐河係屎水、而果ｄ彩色就係爛鬼貨櫃…
 
＠續上，又一個不知名的建築物，仲有座類似發射塔的東西同埋一個直昇機場，玻璃窗都全部碎哂，小心玻璃碎。
 
＠行去建築物外圍，成個深圳巿睇哂，仲見到怨念既筆架山…小休吃蘋果，一流。
  
＠離開建築物南行，路過了大石磨的標高柱。大石磨的另一邊山腳又係練靶場，仲插左紅旗添，但係又唔見有人打緊炮。都唔知要咁多靶場做乜。
 
＠回望大石磨的東崖，有好多露岩，雄心的朋友仔經己玩左，可以參考一下。我地就梗係快快手落山食豆花。山腳下既村落就係目的地河上鄉啦。
  
＠沿脊急降，十分大路，尾段穿過了墳地回到馬路，ｙｏ完成。
 
＠覓路前往河上鄉的豆花廠，途經侯公祠，本想入去參觀一下，但係過左五點後謝絕參觀，比阿叔趕返出黎…真係唔開心。
 
＠向村民問一下路，終於成功去到傳說中既任食豆花廠！招呼十分不俗，有六蚊任食既套餐，仲送埋ＰＲ投懷送抱。
  
＠雖然係六蚊任食，但係今日遲左黎，只餘下最後三碗都比我地清埋，老細仲淨係收我地兩碗錢，真係好人。除左豆花仲有其他產品如豆漿、茶果、燒賣、腐乳等等…今次遲左Ｄ食得唔夠盡興，唯有再Plan過黎覆桌！！
 
＠清埋豆花就返出去等小巴，侯公祠附近還有一所荒廢小學入內參覯一下，見到有好多膠樽，嗯…同我手上攞住果支豆漿個樽好似一模一樣…＝＿\＝
2006年2月4日 |
