|
＠０９００東涌集合，早餐團後嶼巴入伯公坳，１０００落車起步。
 
＠上山行兩步就可以脫離鳳徑，進入南大嶼郊遊徑。  
＠除了後方的大東之外，好快就可以見到是日的第一個目標物「長屻石」出現在正前方的山脊線之上。看似十分近的距離，但由於沒有人研究過坑或脊直擊要害的可行性，大家都很理性地決定大路推進，實際上要南下繞多３ｋ幾先可以去到印石頂。 
＠水平移動再U-turn北轉離開南大嶼郊遊徑，高度攀升，整座鳳凰山慢慢浮現於眼前，由對峪的狗牙嶺至斬柴坳，上鳳頂過南天門，再過返黎印石頂整道山脈均一覽無遺大讚∼
＠介紹返，位於狗牙嶺東坡的巨大露岩便是傳說中的白石岩，亦是鮮有遊人探遊的秘境之一，有興趣可以參考白石岩之旅。  
＠這段路感覺幾好，行走在山脊之上，路旁全是金黃色的草甸，加上微風送爽，十分寫意。邊走邊拍好快見到長屻石出在前方小山之上。
 
＠去到岩下繞場一圈尋找上攀的最佳位置，最後決定在南面萬福瑪利亞旁邊７ｘ度的岩壁試攀，起步果幾下有ｄ難度，但只要靠Friction翻上左邊的岩脊，之後就可以輕鬆登頂架啦∼  
＠與落競上後成功搶攀長屻石，只有ａｂｃ多番嘗試仍然未能闖關，嘲笑啦仲等呀！？  
＠長屻石頂既風景基本上同石下無分別，但被影既話就型廿倍左右，影我啦∼  
＠石頂小休吹吹風，自我滿足完後沿路下扳，但發現下降難度高左兩多，全靠friction既話應搞唔掂。  
＠唯有出動最後絕招！用腳指搾取岩壁上僅有既著力點！
  
  
＠除左鞋戰鬥力立即２００％ｕｐ，而家係我玩塊壁，唔係塊壁玩我ＸＤ   
＠一眾隊員輕鬆下降後信心大增，嘗試找尋其他攀爬路線，先向東面一道石隙埋手，由高手競優先試攀，下段問題不大，但去到臨頂位置變成倒懸狀，除非可以將身體ZIP到得２０厘米穿隙上頂，否則就要由外圍繞上頂，極端外露搏唔過。
 
 
＠再來由北面搶攻，看似平直的石壁，細看之下發現有無數的石米手位，再加上下半段一道斜走的石隙，只需配合適當的力道控制，難度只會比剛剛南線更加容易∼  
＠至此，歷時一小時的長屻石攀登路線研討會正式閉幕，合照一個繼續上路∼
  
＠接回鳳徑研究下ROUND2路線，隊中三名隊員都攀夠架啦，動議大路伯公坳閃人，返東涌仲可以食到LUNCH，正架＝＿＝。此言一出，唯一搶攀長屻石失敗既隊員立即面露難色，如果就此撤退既話對某隊員黎講，今日既行程可謂完全地無為ＸＤ
 
＠睇在ａ君的怨念份上，小隊決定補完一座北峰嶂，接地塘仔郊遊徑再下降鳳東飛流出東涌咁∼好出發∼  
＠沿鳳徑上行一段，第一次見識到傳說中既倒靴石，就係真係有一對boot夾硬痴左起一塊岩石上面＝＿\＝  
＠在旁邊的６２０涼亭小休一會，有麥芽糖夾餅食呀∼正∼  
＠過涼亭行多兩步就可以在右手邊的山坡找到落山小徑。  
＠左望可賞羅漢全脊。下降途中發現旁邊的山峪之中不時有光線閃動，一度懷疑是求救訊號，駐足觀察了五分鐘最後證實係有個膠袋俾風吹緊…＝＿\＝
 
＠快步下降唔使３０分鐘就找到了北峰嶂的古舊標高柱，再１０分鐘已經接回地糖仔郊遊徑，快∼  
＠春花時節，郊遊徑兩旁盛開了無數吊鐘。
  
＠右折無耐就到達鳳東飛流的上源入口，去到鳳東主瀑為止一路都係１９小澗，搵個小潭小瀑都無，悶走模式啓動。
  
＠到達鳳東瀑頂立即闊然開朗，鳳東果然名不虛傳，幾個巨大落差瀑布層級而下。  
＠不過旱季黎講就乾到得番一絲弱水流瀑。今日既鳳東只作為退路，無意細賞，瀑壁石脊隨意下攀。
 
＠再半小時光景便到達林務站出澗位∼
 
＠散步回東涌之前仲順手參觀下東涌炮台，最後出東涌食個靚Tea收工∼
2007年2月3日 |
