|
＠大家可以click下今次行程的地圖就知柴灣行過黎小西灣海邊係幾咁多餘…不過對我呢d新界仔黎講都係地鐵起步方便，行就行啦！
 
 
＠喺海邊小休2野欣賞下個海景就開始由公園上山，公園有一條極平整的海景靚路，簡直係晨運嘅天堂，遠望到東龍島。  
＠路嘅盡頭原來就係傳說中嘅黑角頭燈塔，不過喺鐵絲網所阻下，未能順暢地一窺全豹。  
＠難得咁大條路黎到黑頭角燈塔，無可能唔由旁邊嘅崎嶇小路急降黑角頭啦！條路都真係幾鬼斜，要遊繩近十條先急降到海邊… 一出就已經係極東的窮途黑角頭！  
＠除左三數磯佬喺度搞磯嘅歡笑聲外，就只有驚濤裂岸嘅聲音，呢段岩岸食正東風，真係無風都起三尺浪，同白嶺海有得fight！睇下幾時人強馬壯可以走佢一轉啦！  
＠一場黎到，我打左封電報上海角極東之岩塔，天涯海角人lup水，無可避免。  
＠大hae一輪當然原路折回啦，燈塔旁有小路可登117m小峰頂，無柱，再行馬路skip左166m個頂，呢2座山睇黎睇去都無名，由佢，拜柱教妖人可試登166m頂的標高柱~相信別有一番風情。  
＠鏡頭一轉已經上到馬塘山東面山坳，229m涼亭小休就開始今日主菜了。  
＠大路一條登山，半山路邊有戰時廢壘一間，屋頂訓覺都唔錯。  
＠行多兩步就已經到左馬塘山之顛，建有一發射站，而驚喜就在於別注版的圓錐形標高柱一大碌，地下又有另一個廢堡而當中有條隱藏版舊柱，但講觀景就無70年本書講咁好了，因為今時今日d樹都幾高阻晒視野，而留得耐，更會因幅射而甩頭髮，唔好制呀！！走呀阿棠！！  
＠繼續沿小路往西峰進發，原來又起埋發射站，扯吧啦~行程至此已經甩左一半頭髮，難度頗高！  
＠小路急解馬塘坳，至此可在先人協助下落柴灣，續登龍脊又或者好似我今次咁，爽步落大浪灣換衫搭車走人~~
參考資料:
- 小西灣海灣本名馬塘，灣後山峰名馬塘山，其後英軍用此地為軍營，村民搬走，先漸用英文名砵甸乍山，可參考<野外雜誌>易虎著之<香港群山譜>
2007年11月4日 |
