|
＠撘299至沙角尾路落車。
 
＠穿越沙角尾新村，及村後的荒田小徑。經過彎曲坑下源，仲有水。
 
＠接返隔坑墩路，遠觀彎曲山，只有在西貢方向睇先會發現佢係一座山。
  
＠傳說中既舊軍車路，而家就鋪得好靚啦。沿此路進入無耐就會見到彎曲坑的入口。中下段乾坑、枯水、不見天日、無景點，只可以暴走。
 
＠突然接到企板石河，規模唔算好大，企板石河都有香蕉蘭架。
  
＠離開第一條石河，再入澗道後竟然有得攀壁，不過都係輕鬆野，小攀數Hits。
 
＠出澗了發現路線左偏了，仙人點將台起我地既右邊…唯有橫移過去。
 
＠沿路下降返澗道，再上攀仙人點將台，幾好玩，好似已經開左條路。呢個角度影點將台真係一絕!!!
 
＠點將台右邊峽谷亦有一石河"香蕉蘭石河"。我地一路橫移過去馬騮頭。
 
＠激似的馬騮頭。要過去馬騮頭要穿過一段比人高的草叢。我地就起頭上大休食飽睇煙霞風景。
 
＠仲見到麥徑許多豆士行友。大休後離開馬騮頭向老馬出發，冬天彎曲山既山坡都長滿了長長綠草，靚。
  
＠沿麥徑下降一小段，竟發現路邊有極明顯入口，唔使好似第一次竟鏟林入去。荊棘石河，路過而矣，立刻進入樹帶棧道。行走於樹帶棧道，腳旁便是萬丈深淵，但係有樹木可借力不覺得險。
  
＠突然見到前方有人上攀中，真係咁岩，咁都撞到小吉隊伍。佢地正在土石流中遊樂，唯有幫佢地影下相。
 
＠到達象門！隨了穿峽之外，繞右壁從外面進攻亦可，但係只適合癲佬嘗試。一同穿越象門，第一難位，比起第一次爬，今次覺得易左，慢慢摸手位就ok。
 
＠第二層有一級頗高同埋有些許倒，都係要靠一靠樹。過埋呢度就突破象門了。
  
＠最後的淺草坡亦有些惡搞，慢慢抓草而上。一登象門的野豬石。
 
＠小吉公主等在象門旁大休，我地就繼續登頂。山頂又一次無人，真係令人氣餒。極速下降礦場脊。
 
＠成功尋找到跳板石。有好那大條路通去…先黎影一張經典角度。
 
＠一探發覺跳板石有一半是懸空的，後段無野壓住，而下面係三米左右。要企出去真係需要一D膽量…好驚會成塊反落黎…
＠最後路過礦場，隊員競偷取了礦石乙塊。３點半，返躍安食Tea，十分閒遊。
相關遊記:
2005年1月23日 |
