|
＠在耀安邨集合，打的上馬鞍山燒烤場，比的士阿姐鵝…阿威仲好厚顏咁同阿姐吹水。的士費25元，燒烤場後有靚路上一段，但係我地都係揀左左面果條渠上…
 
＠前段手岩，較難上既地方已經set 左繩。有三數個位置需要用手幫助一下。
 
＠兩面都係絕崖，小心。
 
＠後段有一小段密左，上到牛押小休一會就橫渡馬鞍山了，在山頂睇左一陣書。
 
＠下降馬鞍時左面有巨石可玩，沿路有分叉路落礦場脊，唔好行錯。返回麥徑，落到馬鞍岰諗住上一下彎曲搵下馬騮頭，點知搵唔到，放棄∼
 
＠回望東馬鞍猙獰既山勢…那裡集合了所有的惡搞路線。
 
＠大金鐘，路過而不入，好似幾惡搞，應該又係上到撻皮果隻。沿麥徑繞過了∼
 
＠去到馬鞍山郊遊徑四叉路口，左西貢，右燒烤場，前上鹿巢，路不明顯。到達鹿巢石林，有石船、石蜥蝪，仲有好多唔知乜名，總之千奇百怪既形狀都有。
＠昂平高原，全港少數的高原之一。成日有野牛群起度休息搵野食。
 
＠輕登鹿巢山頂，再下降沖溝，在引水道頂爆出黎
 
＠沿引水道馬路落返梅子林村，上石芽的路藏在公廁後面。開得好奇怪既一條路，全線在竹林中直線進行。好有可能係阿威鏟出黎既…路頗斜仲要係鬆泥路加無限枯樹，行到高手競都撻皮。開路既兩名隊員仲要係咁起上面落石…
 
＠近頂位置有一岩岩石裂隙要穿過。
 
＠再過一段灌木叢就到達 540山頂了 ！
 
＠石芽既山勢都幾險峻，東北面絕對直崖…難怪北脊上到咁既樣…
 
＠在石芽山被帶隊既阿樂遺棄，一眾隊員唯有慢慢摸黑搵路落山…睇住阿樂經牛凹落左女婆岰，而我地就在左面覓得另一條路經墳地落黃泥頭。
2003年12月22日 |
